Нов смртен случај од западнонилска треска е регистриран во Македонија, со што бројот на починати од почетокот на епидемијата се искачи на шест. Станува збор за 72-годишен маж од скопската општина Аеродром, кој пред 15 дена бил хоспитализиран со тешка клиничка слика. Бројот на заболени бележи значителен пораст, со повеќе од десет нови случаи во период од само една седмица. Според последните податоци, евидентирани се вкупно 53 пациенти кои ја прележале болеста, се лекуваат или се водат како сомнителни, од кои 50 случаи се лабораториски потврдени, а за тројца се очекуваат дополнителни резултати.
На Клиниката за инфективни болести во Скопје во моментов се хоспитализирани 18 пациенти со потврдена западнонилска треска, а најмладиот пациент има 26 години и е во добра здравствена состојба. Петмина од хоспитализираните се на интензивна нега со тешка клиничка слика и станува збор за повозрасни лица.
Само еден ден претходно, министерот за здравство Сашко Клековски информираше дека имало пет смртни случаи, 50 потврдени и три сомнителни случаи, како и 21 хоспитализиран пациент, од кои шестмина биле на интензивна нега. Клековски тогаш соопшти и дека 25 пациенти кои биле лекувани на Инфективната клиника се излекувани и пуштени дома, а 52 од вкупно 53 евидентирани пациенти развиле невроинвазивна форма на болеста. Здравствените власти продолжуваат да ја следат состојбата, додека во Скопје е завршена четвртата тура прскање против возрасни комарци и се спроведуваат дополнителни третмани во ризичните подрачја.
