Во текот на изминатото деноноќие низ Македонија се регистрирани вкупно 31 пожар на отворен простор, од кои осум се активни, а 23 се изгаснати, информира Центарот за управување со кризи. Меѓу поголемите пожари беше и оној што вчера околу пладне се прошири кон Струмица и месноста Софилар, но огнот во меѓувреме е ставен под контрола.
Според командирот на ТППЕ Струмица, Александар Гудев, под контрола е целиот потег од селата Водоча и Баница до Софилар, а активно останува само едно тешко пристапно жариште кај Водоча. Во еден момент пламените јазици навлегле во дворовите на куќите и викендичките во Софилар, но според градоначалникот Петар Јанков нема поголема материјална штета. Во гаснењето учествувале пожарникари од Струмица и околните градови, еден „ер трактор“ на ДЗС и механизација која ископувала противпожарни пречки.
Според ЦУК, активен е пожарот кај прилепското село Бонче, каде што гори ниска вегетација и нискостеблести растенија. Огнот е активен и меѓу Моране, Вртекица и Рамни Габер, со крак кон Палиград, како и над селото Вражале во Општина Зелениково, каде што е зафатена мешана шума.
Во Студеничани се интервенира кај селото Цветово, на стариот пат кон Елово, додека во Македонски Брод активни се пожарите кај Видуш, Драгов Дол и Локвица. Во Кичевско гори високостеблеста букова шума кај селото Тајмиште, во месноста Дарда. Активни пожари има и кај Ломница и Ѓурѓевиште во Општина Врапчиште, како и во општините Маврово и Ростуше и Желино.
Од вкупно 31 регистриран пожар, 23 се целосно изгаснати во повеќе општини низ државата, а гореле ниска вегетација, шума, стрништа, депонии, отпад и овоштарници. Во Гостиварско, пожарот кај селото Теново е изгаснат, но претходно зафатил ниска вегетација и две стари куќи.
