Колумбија прогласи вонредна состојба по силниот земјотрес со јачина од 7,4 степени што ја погоди земјата, при што според најновите информации загинаа повеќе од 110 лица, а над 1.500 објекти се оштетени и прогласени за небезбедни за живеење.
Претседателот Абелардо де ла Есприеља соопшти дека лично ќе раководи со справувањето со кризата.
„Јас лично ќе бидам на чело на оваа национална криза и неуморно ќе патувам низ земјата за да ги преземам неопходните мерки“, објави тој на платформата Икс.
Земјотресот се случи во понеделникот во општината Сан Хозе дел Палмар, околу 250 километри северно од главниот град Богота, предизвикувајќи големи човечки и материјални последици.
Како итна мерка, колумбиската влада распореди армиски единици кои ќе учествуваат во потрагата по преживеани под урнатините и ќе им помагаат на спасувачките екипи, објави весникот „Ел Еспектадор“.
Најтешко погодени се сиромашните делови на департманот Чоко, каде што јавната инфраструктура е ограничена, а околу 70 проценти од населението живее во сиромаштија. Дополнителен проблем претставува и присуството на вооружени групи кои контролираат делови од регионот.
Подрачјето е познато по силната сеизмичка активност. Во 1999 година земјотрес со јачина од 6,9 степени го разурна градот Арменија, при што животот го загубија повеќе од 1.000 луѓе.
По најновата катастрофа, бројни земји и организации понудија помош. Соединетите Американски Држави одобрија финансиска помош од 15,5 милиони долари, додека претседателката на Европската комисија Урсула фон дер Лајен соопшти дека Европската Унија е подготвена да помогне и дека веќе е активирана сателитската служба „Коперник“ за поддршка на спасувачките операции.
Поддршка пристигна и од светски познатата колумбиска пејачка Шакира, која преку социјалните мрежи испрати порака со сочувство и охрабрување до својот народ.
