Премиерот Христијан Мицкоски порача дека Владата нема да прифати безусловни отстапки кога станува збор за националните интереси и истакна дека чувствува одговорност единствено пред граѓаните, кои, според него, ја оценуваат работата на институциите преку изборите.
Тој изјави дека според извештаите на Европската комисија, Македонија е меѓу најуспешните земји во регионот во спроведувањето на реформите, но нагласи дека измените на Уставот и обврските преземени од претходната власт не ги смета за реформи.
„Нашиот став е јасен. Обврска на Владата е да го штити македонскиот национален идентитет и нема да правиме безусловни отстапки по тоа прашање“, изјави Мицкоски.
Премиерот додаде дека конечната оценка за работата на Владата ќе ја дадат граѓаните на избори. Посочи дека доколку тие одлучат да ѝ ја дадат довербата на друга политичка опција, актуелната власт ќе премине во опозиција, а тој ќе се повлече од политиката.
Според него, граѓаните се изморени од долгогодишни неисполнети ветувања и национални отстапки направени без јасни гаранции за напредок кон европската интеграција.
Мицкоски овие ставови ги изнесе при посетата на Охрид, каде што изврши увид во реконструкцијата на средното училиште „Свети Климент Охридски“ и на реконструираната улица „Кленоец“.
