Од јануари до мај оваа година се регистрирани 4,0 проценти повеќе возила во споредба со истиот период лани, што претставува стабилен резултат, и покрај политичката неизвесност и ослабената економска активност. Позитивниот тренд, сепак, главно е поттикнат од промените во структурата на пазарот и зголемената побарувачка за одредени типови погони.
Растот на продажбата на нови автомобили најмногу се должи на зголемениот интерес за хибридни и електрични возила, при што улога имаат и повторното воведување на субвенции на одредени европски пазари, како и други поволности за купувачите на електрифицирани возила.
На европскиот пазар и натаму доминираат класичните хибридни возила, кои учествуваат со речиси четири од секои десет нови регистрации. Со удел од 37,8 проценти и околу 1,8 милиони возила, хибридите се убедливо најзастапени пред бензинските автомобили, кои имаат удел од 22,4 проценти од вкупните новорегистрирани возила во првите пет месеци.
Трет најпопуларен избор се целосно електричните автомобили. Во периодот од јануари до мај се регистрирани 950.521 возило на батерии, што претставува најголем раст од 35,7 проценти меѓу сите типови погони во споредба со истиот период лани.
Приклучните хибриди, кои претходно имаа значајно учество на пазарот, бележат пад на популарноста и годинава учествуваат со 9,7 проценти. Воедно, дизел возилата се единствениот сегмент со значително намалување, со 361.971 продадени возила и удел од 7,6 проценти.
Останатите типови погони, како метан и автогас, учествуваат со 2,4 проценти од пазарот, најмногу поради нивната присутност на одредени национални пазари, меѓу кои Италија.
Податоците покажуваат дека во првите пет месеци се регистрирани 950.521 целосно електрични возила, што претставува околу 20 проценти од пазарот. Најголем раст е забележан на трите најголеми европски пазари кои заедно сочинуваат 63 проценти од сите електрични возила: Италија со раст од 75,7 проценти, Франција со 55,4 проценти и Германија со 40,9 проценти, додека Белгија бележи минимален раст од 2,8 проценти.
