Во последните години сè поголем фокус се става на долговечноста и начините на кои луѓето можат да го забават процесот на стареење. Иако на пазарот постојат бројни трендови како додатоци во исхраната, ладни бањи и различни „биохакинг“ практики, експертите истакнуваат дека најголемо влијание врз здравјето и животниот век сè уште имаат основните животни навики.
Меѓу нив најважни се правилната исхрана, редовната физичка активност и квалитетниот сон, кои заедно претставуваат темел на добро здравје и нормално функционирање на организмот.
Една од навиките што најчесто се поврзува со забрзано стареење е хроничниот недостаток на сон. Според експертите, телото за време на спиењето поминува низ клучни процеси на обновување, а неговото нарушување може да има сериозни последици.
„Хроничното лишување од сон ја нарушува способноста на телото да го поправи и замени оштетеното ткиво. Сонот е клучно време за обновување на клетките“, изјавува ендокринологот д-р Сара Вон за медиумот „Параде“.
Таа објаснува дека долготрајниот недостаток на сон го зголемува оксидативниот стрес и воспалителните процеси во организмот, што со текот на времето може да доведе до оштетување на клетките. Според неа, оваа нерамнотежа помеѓу штетата и обновувањето се смета за еден од факторите што придонесуваат за биолошко стареење. Истражувањата, исто така, укажуваат дека хроничниот недостиг од сон може негативно да влијае и на ДНК структурата.
Слични предупредувања дава и неврологот д-р Томи Вуд, кој истакнува дека долготрајниот стрес предизвикан од недостиг на сон може да има сериозни последици врз имунолошкиот систем.
„Ако кортизолот остане покачен подолг временски период, тоа може да ја наруши имунолошката функција“, наведува тој, додавајќи дека воспалителните процеси во телото дополнително се зголемуваат при недоволен сон, што придонесува за побрзо стареење на организмот.
Покрај здравствените последици, недостатокот на сон има и видлив ефект врз изгледот. Според д-р Вон, дури и краток период на недоволен сон може да влијае на кожата. Таа наведува дека само две ноќи со ограничен сон во една студија довеле до намалена хидратација и еластичност на кожата.
Д-р Вуд дополнува дека недоволниот сон може да го наруши и производството на колаген и еластин, две клучни супстанции за цврстината и младешкиот изглед на кожата. Како резултат на тоа, кожата може побрзо да ја изгуби својата еластичност и свежина.
Експертите генерално се согласуваат дека, и покрај современите трендови и различни методи за „подмладување“, најсилното оружје против забрзано стареење остануваат едноставните навики: доволен сон, здрава исхрана и редовно движење.
