Во делчевското село Разловци денеска свечено беше одбележана 150-годишнината од Разловечкото востание – еден од најзначајните историски настани во македонската револуционерна историја. Настанот помина во знакот на почитта кон борците за слобода, државноста и зачувувањето на националниот идентитет.
На свеченоста присуствуваа бројни делегации, претставници на државните институции, локалната власт, културни дејци и граѓани, кои оддадоа почит на востаниците што пред еден и пол век го кренале гласот против османлиската власт.
Во своето обраќање, премиерот Христијан Мицкоски истакна дека Разловечкото востание претставува симбол на борбата за слобода и достоинство, нагласувајќи дека денес државата се брани на поинаков начин – преку силни институции, образование, економски развој и национално единство.
Тој порача дека историското наследство не смее да биде предмет на политички компромиси и потенцираше дека интересот на државата и иднината на младите генерации мора секогаш да бидат над партиските и личните интереси.
На одбележувањето се обрати и министерот за култура Зоран Љутков, кој нагласи дека токму локалните востанија како Разловечкото биле темел за подоцнежните револуционерни движења и за создавањето на националната свест.
Тој информираше дека во реконструкцијата на Спомен-домот во Разловци биле вложени околу 20 милиони денари, со цел зачувување на историското наследство и создавање простор кој ќе сведочи за значењето на востанието и за идните генерации.
Градоначалникот на Делчево, Иван Гоцевски, најави иницијатива Разловци да добие статус на заштитена историска целина, а 19 мај да се разгледува како можен неработен ден на локално ниво.
Свеченоста заврши со положување свежо цвеќе пред реконструираниот Спомен-дом во Разловци, каде присутните им оддадоа почит на востаниците и на историските настани кои оставиле длабока трага во македонската историја.
