Роберт Левандовски официјално потврди дека ја напушта Барселона по завршувањето на сезоната. Полскиот напаѓач преку емотивно видео на социјалните мрежи соопшти дека неговата етапа во каталонскиот гигант завршува по четири години исполнети со успеси, трофеи и незаборавни моменти.
Навивачите на Барселона утре на „Спотифај Камп Ноу“ ќе имаат можност последен пат да го поздрават еден од најдобрите голгетери во модерниот фудбал. Договорот на Левандовски истекува на крајот од јуни, а тој потврди дека нема да остане во клубот и следната сезона.
Полјакот пристигна во Барселона во летото 2022 година од Баерн Минхен и веднаш стана лидер во нападот на тимот. Иако оваа сезона имаше нешто помала улога, сепак уште еднаш покажа дека неговиот голгетерски инстинкт не исчезнал.
„По четири години полни со предизвици, труд и незаборавни моменти, време е да продолжам понатаму. Заминувајќи чувствувам гордост и благодарност за сè што доживеав тука“, порача Левандовски во видеото за збогување.
Тој додаде дека никогаш нема да ја заборави поддршката од навивачите и дека Каталонија секогаш ќе има посебно место во неговото срце.
Во дресот на Барселона одигра 191 натпревар, постигна 119 голови и запиша 24 асистенции. Со клубот освои три титули во шпанското првенство и помогна тимот повторно да се врати во борба за европскиот врв.
Левандовски зад себе има блескава кариера и во Борусија Дортмунд и Баерн Минхен, а во кариерата постигна повеќе од 700 голови. Во 2020 и 2021 година беше прогласен за најдобар фудбалер во светот.
Во последните недели неговото име се поврзуваше со неколку големи клубови, меѓу кои Јувентус, Милан и Чикаго Фајер, но според најавите најблиску до неговиот потпис е Ал-Хилал.
Саудискиот клуб наводно му понудил договор вреден дури 90 милиони евра по сезона, што би бил најголемиот финансиски договор во кариерата на полскиот напаѓач.
