Веќе се видливи последиците од демографската криза во Македонија дека таа не смее да се третира исклучиво како прашање на статистика, оцени премиерот Христијан Мицкоски на денешната меѓународна конференција посветена на демографијата и додаде дека досегашниот пристап, фокусиран главно на бројки, создал политики без долгорочна визија и вистинско влијание.
Според премиерот суштината е во квалитетот на животот, во довербата што граѓаните ја имаат кон сопствената држава, во чувството дека тука можат да создадат дом, семејство, кариера и иднина, а клучниот проблем е јазот во демографската отпорност, односно неподготвеноста навреме да се препознаат и менаџираат промените.
Во тој контекст ја најави новата Стратегија за демографска отпорност 2026–2046 во чија основа е вложувањето во луѓето.
Министерот за социјална политика, демографија и млади, Фатмир Лимани оцени дека регионот и Источна Европа се соочуваат со длабоки и долгорочни демографски предизвици кои не познаваат граници и не можат да се решаваат изолирано па затоа е потребна заедничка акција, споделување на знаење и координирани решенија што ќе ги поврзат регионите и ќе создадат одржливи можности за сите генерации.
