Во последно време премногу агресија има меѓу населението во Македонија. Само во тековните десетина дена во земјава се случија серија на тешки насилни настани. Имаше повеќе убиства и други сериозни инциденти во краток временски период.
Особено загрижувачки се денешниот и вчерашниот инцидент од Гостивар и од Росоман, кога децата посегаат по животот на свој родител.
Утрово во Гостивар, 34-годишник е приведен и осомничен за убиство на својот татко во семејниот дом. Вчера во Росоман, 27-годишен син со нож ја убил својата 54-годишна мајка додека спиела.
Само неколку дена претходно, на 27 март во Охрид, во семејна куќа беше пронајден убиен 76-годишен маж, набргу осомничениот беше уапсен.
На 28 март пак, во Виница беше пронајдено тело на ловочувар 56-годишен маж со прострелна рана, а за случајот беа приведени повеќе лица.
Сето ова е ептен алармантно и загрижувачко. Агресијата кај дел од населението е се понагласена. На, пример во Скопје викендов се случи масовна тепачка пред дискотека, при што беа повредени и полициски службеници кои интервенирале. Во Аеродром пак насилник кој возел џип „БМВ” намерно удрил во човек кој се возел на тротинет, по што излегол од возилото и го нападнал.
Ваквото негативно поведение ги заразува и младите па така само деновиве имаше неколку напади врз малолетници од кој најкарактеристичен беше оној од Карпош каде малолетници биле нападнати од поголема група на врсници на автобуска постојка.
Сето ова треба да не подзамисли сите во општеството. Секој еден треба да придонесе агресивноста да се смири, премногу се полни црната хроника во Македонија.
