Безобразлукот на неодговорните возачи навистина нема граници! Најново пробивање на границата е тоа дека во Скопје автобус од јавениот превоз бил управуван од човек без возачка дозвола.
Не, не, ова не е анегдота, туку реалност откриена во последната полициска контрола врз автобусите во Скопје што се вклучени во јавниот превоз на патници.
Како можела компанијата да дозволи автобус да управува лице без дозвола? И не е само тоа прашање, туку и како е можно 6 други возачи да немале задолжително лекарско уверение, а четири возила биле технички неисправни.
Сепак, најшокантниот податок е дека еден возач бил уапсен затоа што управувал автобус без воопшто да поседува возачка дозвола. И тука веќе не станува збор за прекршок, туку за директно загрозување на човечки животи.
И уште колку вакви возачи ни ги превезуваат секојдневно нашите деца по скопските улици?
Полицијата најавува дека контролите ќе продолжат, но главната контрола треба да биде кај директорите на превозните претпријатија. Таму ептен ги минале професионалните, но и безбедносните граници. Некој мора да поднесе одговорност.
Среќа што Македонија нема авиокомпанија, оти како тргнала работава лесно може да се случи и да им се дозволи на самонаречени пилоти да ги летаат авионите.
