Утрово најстудено во Македонија е на Попова Шапка, каде се измерени -9 степени Целзиусови, а воедно таму е регистрирана и највисока снежна покривка од 59 сантиметри.
По ниските температури следува Крушево со -4 степени, додека -3 се измерени во Берово и Маврови Анови. Температура од -2 степени е забележана во Битола, а -1 во Охрид и Претор.
Во повеќе градови утрово температурата се движеше околу нулата, па така 0 степени се измерени во Скопје-Петровец, Тетово, Куманово, Крива Паланка и Прилеп. Повисоки температури се регистрирани во Штип и Виница со 2 степени, 3 степени во Скопје-Зајчев Рид, Велес и Кавадарци, 4 во Демир Капија, 5 во Струмица, додека најтопло било во Гевгелија со 6 степени Целзиусови.
Според Управата за хидрометеоролошки работи, времето во текот на денот ќе биде променливо облачно со сончеви периоди. Претпладне ќе преовладува сончево време со мала до умерена облачност, додека попладне облачноста ќе се зголеми.
Ќе дува умерен, а на места повремено засилен ветер од северен правец. Максималната дневна температура ќе се движи од 9 до 16 степени Целзиусови.
Во Скопје се очекува променливо облачно време со сончеви интервали и слаб до умерен ветер од северен правец, кој повремено ќе засилува. Дневната температура ќе достигне до 15 степени.
