Сегашните цени на горивата во Македонија загрижуваат. Превисоки се и неизвесно е какви ќе бидат следниов период.
Инаку, во последните 10 години цените поминаа низ силни осцилации, од историски ниски до рекордно високи нивоа.
Најниските цени беа забележани во 2020 година, кога поради ковид-кризата и падот на глобалната побарувачка, дизелот падна и до 42 денари по литар, а бензинот се движеше околу 50 денари.
Само две години подоцна, ситуацијата драматично се смени, дизелот надмина 100 денари по литар, а еуросупер 98 достигна околу 96 денари, па дури и над 110 денари во одредени периоди. Овој ценовен шок беше директна последица на глобалната енергетска криза, војната во Украина и нарушените синџири на снабдување со нафта и деривати.
По рекордната 2022 година, цените почнаа постепено да се стабилизираат, но никогаш не се вратија на нивото од пред кризата. Во 2023 и 2024 година дизелот се движеше најчесто меѓу 70 и 85 денари, додека бензинот остана во зона од околу 80 до 90 денари. Во 2025 година трендот на умерени, но повисоки цени продолжи, што укажува дека пазарот влезе во ново „нормално” ниво.
Пред две недели цените вивнаа нагоре, при што се приближуваат до историскиот максимум од 2022 година, со тенденција да го надминат доколку воените дејствија на Блискиот Исток не запрат.
Што ќе се случува во наредниот период останува да се види, стабилизацијата на цените е особено важна па затоа и се потребни соодветни и брзи реакции од македонската влада. Мора да се ублажат негативните ценовни последици наметнати од надворешни причини.
