На иницијатива на министерот за внатрешни работи, Панче Тошковски, денеска се одржа тркалезна маса на тема „Предизвици во обезбедувањето поддршка и заштита на жртвите на насилство врз жени и семејно насилство“. Настанот го следеа претставници на институции од судската, обвинителската и безбедносната сфера, експерти, како и претставници на граѓански организации и невладиниот сектор.
Министерот Тошковски потенцираше дека семејното и родово базираното насилство е долгогодишен проблем кој треба да се третира отворено, со цел институциите, граѓаните и целото општество да се фокусираат на ефективни решенија.
„Првата тема што сакам да ја отворам денеска, по препорака на експертите, е како институциите да реагираат веднаш во ситуации на семејно насилство. Насилникот, без оглед на сопственоста на домот, треба да биде изолиран и отстранет, додека семејството, особено децата, да биде заштитено и да се спречат дополнителни штетни последици“, нагласи министерот.
Тој истакна дека секој граѓанин кој забележи потенцијално семејно насилство треба веднаш да ја информира полицијата, потенцирајќи дека полициските службеници ќе продолжат да постапуваат со максимална посветеност во спречувањето на сите форми на насилство, особено заштита на малолетни лица.
По дискусијата, министерот ги сумираше клучните заклучоци од тркалезната маса. Тој најави дека веќе следната недела ќе се состане Националното координативно тело, составено од претставници на релевантните институции и невладиниот сектор, за да се дефинираат брзи законски измени.
„Ќе работиме на измени на повеќе закони за поефикасно институционално постапување и побрза заштита на жртвите, меѓу кои Законот за спречување и заштита од насилство врз жени и семејно насилство, Законот за полиција и Законот за бесплатна правна помош. Од понеделник, Граѓанскиот суд ќе воведе 24-часовно дежурство за побрзо изрекување мерки за заштита на жртвите. Планирани се меморандуми за соработка со невладиниот сектор и донесување правилник за континуирана едукација на вработените во институциите кои постапуваат по случаи на родово базирано и семејно насилство“, изјави Тошковски.
Министерот изрази очекување дека овие процеси ќе се реализираат во најкраток рок и ќе придонесат за поефикасна и посистемска заштита на жртвите од семејно и родово базирано насилство.
