По речиси шестчасовен распит во Основното јавно обвинителство Скопје, поранешниот прв вицепремиер Артан Груби вечерва беше спроведен во Основниот кривичен суд Скопје.
По распитот, кој започнал околу пладне, Груби околу 18:30 часот бил изнесен од зградата на Обвинителството со лисици на рацете и со комбе на затворската полиција пренесен во судот. Спроводот бил реализиран преку гаражниот дел на објектот.
На новинарските прашања „Зошто се вративте?“ и „Дали се чувствувате виновен?“, Груби не одговорил и без изјава се качил во возилото, придружуван од полициски службеници.
Засега од Јавно обвинителство на Република Северна Македонија нема официјална информација за исходот од распитот, ниту дали ќе биде побарана потврда на 30-дневниот притвор што му беше одреден во отсуство во декември минатата година, или ќе биде предложена друга мерка за обезбедување присуство.
Претходно денеска, Министерството за внатрешни работи соопшти дека Груби во 6:10 часот се појавил на граничниот премин „Блаце“, при влез во земјава, по што бил приведен. Тој најпрво бил однесен во затворот „Скопје“ во населбата Шуто Оризари, а потоа спроведен на распит во Обвинителството.
