Со 67 гласа „за“, пет „против“ и без воздржани, Собранието на Република Северна Македонија на 85. седница, по скратена постапка, ги усвои измените на Законот за постапување со бесправно изградените објекти. Со нив рокот за завршување на постапките за легализација се продолжува за дополнителни пет години.
Според досегашното законско решение, крајниот рок за решавање на поднесените барања беше 3 март 2026 година. Со новите измени, тој се пролонгира до 3 март 2031 година.
Барањата за легализација можеа да се поднесуваат најдоцна до март 2011 година, а институциите имаа рок од 15 години да ги завршат постапките. Со измените, рокот практично се продолжува на 20 години.
Подносителите на измените појаснуваат дека не се менуваат условите за поднесување барања, ниту се отвора можност за нови апликации за легализација на дивоградби. Целта е да им се овозможи на институциите да ги финализираат веќе започнатите постапки за граѓаните кои навремено поднеле документација и сè уште чекаат решение.
