Сојузот на синдикати на Македонија денеска во 9 часот ќе го блокира пристапот до Собранието, со што ќе започнат блокади на институции за кои од ССМ велат дека го кочат зголемувањето на минималната плата. Предвидено е да бидат блокирани улиците „Даме Груев“ и „11 Октомври“ кај зградата на законодавниот дом.
Од ССМ порачуваат дека со блокадата сакаат да испратат јасна порака до пратениците, кои според нив повеќе од една година го блокираат законот за зголемување на минималната плата, како и иницијативата за намалување на функционерските плати.
Претседателот на ССМ, Слободан Трендафилов, изјави дека пратениците и понатаму не ја прифаќаат иницијативата за зголемување на минималната плата и на останатите плати за 100 евра, како и предлогот функционерските плати да се намалат за 80 проценти, односно основицата за нивна пресметка да се намали од просечна на минимална плата.
Претседателот на Собранието, Африм Гаши, најави дека работата на законодавниот дом ќе продолжи и покрај протестот. Тој изрази очекување дека протестот ќе помине мирно и дека нема да има дополнително обезбедување, бидејќи МВР ќе постапува според редовните безбедносни протоколи.
Гаши очекува да бидат блокирани само влезовите за возила, додавајќи дека пратениците ќе можат да дојдат на работа пеш. Во однос на барањата за минимална плата од 600 евра и линеарно зголемување на останатите плати за 6.000 денари, тој рече дека секоја политичка партија ќе заземе сопствен став.
Премиерот Христијан Мицкоски повтори дека минималната плата ќе се зголеми согласно законските решенија, но дека Владата не го прифаќа предлогот државата привремено да ги финансира придонесите на работодавачите. Тој посочи дека Владата ќе поддржи договор меѓу работодавачите и работниците, но предупреди дека во Буџетот нема средства за дополнителни обврски. Мицкоски најави и корекција на коефициентите за платите на функционерите до крајот на февруари.
Министерот за економија и труд, Бесар Дурмиши, изјави дека прашањето за минималната плата е чувствително и дека решенијата не треба да се носат под притисок. Тој информира дека се очекуваат податоците од Државниот завод за статистика и дека во март ќе има законско усогласување на платите од 1.500 до 2.000 денари.
Дурмиши додаде дека дијалогот за платите во јавниот сектор е заокружен, откако Владата постигна договор со дел од репрезентативните синдикати за зголемување на платите на околу 11.000 административни работници, по претходните договори во здравството, образованието, одбраната и полицијата .
