Викторија Бекам доби високо француско признание за својот придонес во модната индустрија, откако во Париз беше одликувана со титулата Chevalière de l’Ordre des Arts et des Lettres – една од најзначајните културни почести што ги доделува Франција.
Одликувањето на модната икона Викторија Бекам беше изведено на свеченост во француското Министерство за култура, која се совпадна со одржувањето на Париската модна недела – симболично нагласувајќи ја нејзината улога и влијание на глобалната модна сцена.
Признанието доаѓа како резултат на нејзината долгогодишна работа како дизајнерка и поради успешниот развој на модниот бренд што таа го изгради по завршувањето на музичката кариера.
На церемонијата, Бекам се појави во минималистичка црна креација од сопствената колекција, доследна на стилот по кој е препознатлива. Поддршка доби и од семејството – нејзиниот сопруг Дејвид Бекам и нивните деца Харпер, Круз и Ромео беа присутни на настанот.
Орденот Arts et des Lettres се доделува од 1957 година на личности кои оставиле значаен белег во уметноста, културата и креативните индустрии на меѓународно ниво. По доделувањето, таа на социјалните мрежи изрази благодарност за укажаната чест, истакнувајќи дека признанието има особено значење за неа. Посебна благодарност упати до семејството и тимот со кои ја градела својата модна приказна.
Церемонијата во Министерството за култура помина без голема медиумска изложеност, што, според француските медиуми, било поврзано со актуелните семејни тензии во семејството Бекам. На настанот присуствуваа нејзиниот сопруг Дејвид Бекам и нивните деца Харпер, Круз и Ромео, додека најстариот син Бруклин не беше присутен.
Француската министерка за култура Рашида Дати ја опиша Викторија Бекам како „глобална икона со посебно место во срцата на Французите“, истакнувајќи го нејзиниот прецизен и речиси архитектонски пристап кон дизајнот. Таа нагласи дека Бекам со години гради силна и трајна врска со Франција, каде што од 2022 година ги претставува своите модни колекции.
