Градските инспекциски служби во изминатиот период вршеле засилени контроли на индустриските капацитети околу загадениот воздух. Само во периодот од 6 ноември до 1 јануари, издадени се 90 прекршочни платни налози и глоби, 33 решенија за задолжување, 35 вонредни надзори и 290 опомени. Изречени биле глоби во висина од 1.000 до 53.000 евра.
-Инспекторите за животна средина извршија над 45 вонредни надзори на правни субјекти во кругот на поранешните фабрики ОХИС и Стаклара, како и на територијата на општина Сарај – напиша градоначалникот на Град Скопје, Орце Ѓорѓиевски на својот фејсбук профил.
Тој информира дека за буџетот за 2026 година се предвидени 64 милиони денари за делот за животна средина, во споредба со 24 милиони денари во 2025 година, што, како што вели, јасно покажува колку сериозно ја сфаќаат заштитата на здравјето на граѓаните.
