Во утринските часови земјава е под влијание на нагло и изразено заладување, предизвикано од продор на ладна воздушна маса од север. Снегот и снежната покривка постепено се шират, при што најпогодени се западните делови на Македонија, а снежната граница брзо се спушта и кон пониските предели.
Во текот на денот и во наредните часови, на повеќе локации дождот ќе преминува во снег. Во западните региони се очекува формирање на снежна покривка, особено во повисоките населени места и планинските области, каде висината ќе достигне од 10 до 15 сантиметри, а локално и над 20 сантиметри.
Снежна покривка ќе се формира и во дел од градските средини, со висина од 5 до 10 сантиметри. Времето ќе биде проследено со засилен до повремено силен ветер од западен и северозападен правец, кој подоцна ќе го промени правецот кон север, а локално ќе достигнува брзина над 60 километри на час.
Во Скопје и околината се очекуваат послаби врнежи од снег, со повремено засилен северен и северозападен ветер. Максималните дневни температури ќе се движат меѓу 0 и 7 степени, додека во главниот град ќе изнесуваат околу 3 до 4 степени Целзиусови.
На повисоките населени и планински места температурите ќе останат под нулата и во текот на денот, што ќе придонесе за задржување и дополнително зголемување на снежната покривка.
