Ова се мерките за земјоделците кои Владата на Грција ги соопшти:
Намалување на цената на струјата на 8,5 центи за киловатчас до 2028 година; поврат на посебниот данок на потрошувачка на нафта; 100 отсто покриеност на обесштетувањето при елементарни непогоди, специјален баркод за потеклото на производите, се дел од мерките што денеска ги соопштија вицепремиерот на Грција и надлежните министри во грчката Влада за поддршка на земјоделците.
Вицепремиерот Костис Хаѕидакис уште еднаш посочи дека од 27 барања на земјоделците, 16 се исполнети или се третираат позитивно, четири се разгледуваат, додека пак седум се или вон буџетската или вон европската рамка и повтори дека секогаш се отворени за дијалог со земјоделците.
Цената на струјата е едно од главните барања на земјоделците, кои бараат да биде 7 центи за киловатчас, а Владата денеска соопшти 8,5 центи, наспроти претходно најавените 9,3 центи за киловатчас.
За поврат на посебниот данок на потрошувачка на нафта, согласно соопштеното, земјоделците во суштина нема да го плаќаат данокот со оглед на тоа што преку специјална апликација на пумпите ќе ја плаќаат директно цената одредена за нив.
Земјоделците се очекува во попладневните часови да одржат состаноци за да ги разгледаат владините мерки и да одлучат дали ќе продолжат со најавената 48-часовна блокада на цела Грција за утре и задутре. Од Владата најавиле дека доколку земјоделците не ги запрат протестите и блокадите, ќе се изрекуваат казни за оние кои продолжуваат со затворање на патиштата.
