Да бидеме фер и отворени – многу е лесно да се земе делот од пазарот што е профитабилен и што одговара, а Македонска пошта да има општествена одговорност – писмото што јас денеска му го праќам на градоначалникот на Вевчани да го однесе во услови кога никој друг не го прави тоа. За ова ќе разговараме во следниот период зашто состојбата не може да остане ваква – или сите подеднакво ќе го носат товарот или ќе носиме други одлуки. Мојата намера е Македонска пошта да расте, а не да пропаѓа, порача денеска министерот за транспорт Александар Николоски.
Во обраќањето на јавниот состанок што го одржа Агенцијата за пошти, Николоски потсети дека и барањето во Планот за раст е да се подобри ефикасноста на услугите со намалување на трошоците до 15 отсто, како и да се подобрат индикаторите за профитабилност исто така до 15 проценти, но тоа, потенцира, во сегашните услови кај нас е невозможно.
– Македонија во континуитет ја следи европската пракса за регулација на поштенскиот пазар на услуги што понекогаш ни создава сериозни главоболки, имајќи предвид дека ние сме Влада што сака да го штити државниот капитал и државните компании да напредуваат, за разлика од други влади кои беа подготвени да ги продаваат. Одредени наши претходници сега се со судски постапки токму поради такви одлуки. Ние би сакале Македонска пошта да расте и да напредува. Овие директиви во услови кога не сме членка на ЕУ навистина ни создаваат главоболки во делот на функционирањето на Македонска пошта. Мојата намера е Македонска пошта да расте, а не да пропаѓа. Во таа насока, повторно доаѓаме до ЕУ – барањето во Планот за раст е да се подобри ефикасноста на услугите со намалување на трошоците до 15 отсто и да се подобрат индикаторите за профитабилност исто така до 15 проценти, што во услови кои ги опишав претходно мислам дека е невозможно. Затоа мора да ги менуваме условите, подвлече министерот.
Тој најави и дека ќе има законски измени кои ќе одат токму во оваа насока.
-Правиме консултации со сите релевантни чинители и играчи на пазарот, но наша задача и цел е да го заштитиме државниот капитал и тоа ќе го правиме, истакна Николоски.
Воедно информира дека следниов месец Македонска пошта од Владата ќе добие 100 возила, 90 помали комбиња и 10 големи комбиња со кои ќе може да се подобрат условите за работа.
-Работиме и на програма што ќе значи дополнителна помош за Македонска пошта и во делот на софтвер, сортирки, просторни услови и можност за испорачување најдобри услуги на пазарот. Во таа насока соработката со Агенцијата има клучна улога, рече Николоски
