Сагата со „Зимзоленд” и тоа кога ќе биде затворен оти нема потребна документација уште трае. Најново е дека Општина Аеродром издало решение до битолската фирма „Мега луна 25″, организаторот на „Зимзоленд” во рок од три дена да ги отстрани реквизитите.
„Ако опремата не се отстрани во определениот рок ќе се постапи кон присилно административно извршување на градбата”, апелираат од Општина Аеродром.
Но, сепак рокот од 3 дена важи откако Зимзоленд ќе го добие решението. Е сега тоа може и да патува од Општината до забавниот парк и неколку дена, таман да дојде Нова Година, кога и Зимзоленд предвидел регуларно затворање.
Во меѓувреме Зимзоленд се уште си работи и по една недела откако обвинителството побара од МВР да му биде доставена документација за да се утврди дали има елементи за кривично дело „Предизвикување општа опасност”, ништо не е доставено до него. Само на крај да не излезе работата „Зимзоленд“ да мора да се преименува во „Летоленд“?
