Министерот за внатрешни работи Панче Тошковски, заедно со директорката на Универзитетската клиника за пластична и реконструктивна хирургија, д-р Јасмина Георгиевска-Павловска, и генералниот секретар на Црвен крст на Република Северна Македонија, д-р Саит Саити, денеска на Плоштад Македонија присуствуваа на показна вежба изведена од ученици од средното училиште СУГС Владо Тасевски, во рамки на превентивната кампања „Сигурни празници, без употреба на пиротехника“.
Кампањата се реализира во организација на СВР Скопје – Одделение за превенција и Црвен крст на Град Скопје, со поддршка на Универзитетската клиника за пластична и реконструктивна хирургија. Фокусот е ставен на подигање на јавната свест за сериозните ризици и последици од неовластената употреба на петарди и други пиротехнички средства, особено кај децата и младите.
Министерот Тошковски упати благодарност до сите институции и учесници вклучени во кампањата, нагласувајќи дека заштитата на животот и здравјето на најмладите претставува врвен приоритет.
„Овие превентивни активности имаат огромно значење. Ниту една прослава не вреди колку здравјето и животот на нашите деца. Благодарност до Црвениот крст, до Клиниката за пластична хирургија, до Средното училиште ‘Владо Тасевски’ и до учениците кои со своето учество испратија силна порака до јавноста“, изјави Тошковски.
Во своето обраќање, министерот посочи дека Министерството за внатрешни работи годинава бележи значително зголемена откривачка активност во делот на нелегалната пиротехника. Заклучно со ноември 2025 година, откриени се околу 155.000 парчиња пиротехнички средства, што е речиси трипати повеќе во споредба со 2024 година, кога биле запленети околу 52.000 парчиња. Само во текот на овој месец, во рамки на посебна оперативна акција, запленети се дополнителни над 30.000 парчиња пиротехника.
Тошковски нагласи дека овие бројки се доказ за интензивната работа и посветеноста на полициските службеници, но и сериозен аларм за големиот обем на пиротехнички средства што циркулираат во државата.
„Ќе продолжиме со решителни репресивни мерки, но превенцијата е суштинска. Мораме заеднички да ја подигнеме свеста дека пиротехниката не е неопходна за убави празници. Оваа порака ќе ја пренесуваме не само во Скопје, туку и низ целата држава“, порача министерот за внатрешни работи.
Од Министерството за внатрешни работи апелираат граѓаните да се воздржат од користење пиротехнички средства и заеднички да придонесат за безбедни и мирни празници за сите.
