Аеродром е кошаркарска општина. Тоа пак го потврдија кошаркарите на МЗТ кои со леснотија во неделата го победија вечниот ривал Работнички. Ова сигурно ќе биде дополнителен стимул младите да играат баскет на многуте игралишта во опшината. Но, во каква состојба се терените?
Екипата на Прва Скопска ТВ на повеќе места виде дека е потребна брза интервенција на општината.
На пример двата коша во паркот Авионче се речиси распаднати, едниот обрач е навален и може во секое време да падне. Луѓето кои таму ги затекнавме велат дека состојбата е таква повеќе од две години.
На едно од игралиштата позади ТЦ Капитол, пластичниот под е распукан, а кошот моли да биде обновен или барем зацврстен.
Во близина на салата каде игра МЗТ има убави игралишта, ама кошовите се катастрофа. На едниот му фали обрач. А на друг има обрач, ама стаклената табла ја нема. Еден е со знамето на Македонија, ама тоа не е доволно за да се игра добро баскет на него. Во дворот на ОУ Љубен Лапе пак фали и таблата и обрачот и децата ни велат дека играат на замислен кош.
Има и други слични примери, секако имаше и добри игралишта, но Општината треба да почне да ги средува сите. Оти брзо ќе дојде пролетта кога масовно младите ќе излезат да спортуваат.
