Министерот за внатрешни работи Панче Тошковски денеска во Брисел учествува на Меѓународната конференција на Глобалната алијанса за борба против шверцот со мигранти, на која присуствуваат високи владини и европски претставници.
На конференцијата се разгледуваат клучните трендови во нерегуларната миграција и шверцот со мигранти, со фокус на начинот на дејствување на организираните криминални мрежи, вклучително и организирањето нерегуларна миграција по воздушен пат.
Учесниците дискутираат за стратегии за поефикасно справување со овие појави преку зајакната оперативна и судска соработка, подобрена размена на информации и поврзување на глобалните, регионалните и тематските иницијативи.
Во рамки на собирот се одржуваат три тематски сесии посветени на превенцијата, одговорот и алтернативите на нерегуларната миграција, со цел идентификување добри практики и унапредување на соработката.
Свои обраќања имаат претседателката на Европската комисија Урсула фон дер Лајен и еврокомесарот за внатрешни работи и миграција Магнус Брунер, а меѓу учесниците се и бројни министри, европски комесари и претставници на Фронтекс, Европол и меѓународни организации од Европа, Африка, Азија и Централна Америка.
