93-годишниот претседател на Камерун, Пол Бија, веќе два месеца се наоѓа во Европа и сè уште не се вратил во земјата, објави Асошиејтед прес.
Од кабинетот на камерунскиот претседател првично соопштиле дека Бија отпатувал во Европа на кратко приватно патување. Подоцна, владата потврдила дека претседателот престојува во Швајцарија, но не даде дополнителни детали за неговиот престој или за тоа кога би можел да се врати во Камерун.
Долгото отсуство на Бија од земјата повторно ги отвори прашањата за неговата здравствена состојба, особено поради фактот што тој во изминатите години често престојува во Европа, најмногу во Франција и Швајцарија.
За време на неговото отсуство, со секојдневното функционирање на државата во значителна мера се занимаваат високи функционери на неговата партија и членови на неговото семејство. Бија, кој со Камерун управува од 1982 година, важи за најстариот актуелен претседател во светот.
Тој во ноември го започна својот осми претседателски мандат, откако победи на изборите одржани во октомври. Изборниот процес беше проследен со жестоки политички спорови и обвинувања од опозицијата.
Долгогодишното владеење на Бија го прави еден од најдолговечните лидери на власт во светот. Неговото продолжено отсуство од Камерун во момент кога земјата се соочува со политички и безбедносни предизвици повторно го привлече вниманието кон прашањето кој фактички ги носи клучните одлуки во земјата.
Засега нема официјална потврда дека Бија има сериозни здравствени проблеми, ниту е соопштено кога точно ќе се врати во Камерун.
