Најмалку 34 танкери поврзани со Иран успеале да ја заобиколат американската блокада од нејзиниот почеток, меѓу кои и неколку што превезувале иранска нафта, објави Фајненшл тајмс.
Вашингтон започна со спроведување на блокадата на 13 април, таргетирајќи ги сите бродови што влегуваат или излегуваат од иранските крајбрежни води. До 16 април мерките беа проширени и на сите ирански пловила на отворено море, како и на бродови што превезуваат стока која би можела да ги поддржи иранските воени активности.
Досега, американските сили заплениле еден контејнерски брод во Оманскиот Залив и се качиле на санкциониран танкер во Индо-Пацификот. Од Централната команда на САД (ЦЕНТКОМ) соопштија дека од почетокот на блокадата биле пренасочени или вратени 28 пловила.
Од друга страна пак денеска во Ормускиот теснец иран нападнал три брода, објави Би-Би-Си.
Поморската разузнавачка компанија „Вангард“ потврди дека последниот нападнат брод бил на околу шест наутички милји од иранскиот брег. Според нивните информации, пловилото било запрено од Иранската револуционерна гарда, при што му било наредено да фрли сидро, а пријавена е и штета на трупот и во сместувачките простории.
Овој инцидент следува по извештаите на британската агенција за поморски трговски операции (УКМТО) за претходни два напада што се случиле утрово. Во првиот случај, патролен брод на Иранската револуционерна гарда отворил оган врз контејнерски брод кај брегот на Оман, а набргу потоа бил нападнат и товарен брод во близина на Иран.
Во меѓувреме, Иран соопшти дека запленил два брода во Ормускиот теснец. Според иранските власти, бродовите биле „непослушни“ и биле пренесени кон иранскиот брег.
Иранската новинска агенција Тасним наведува дека пловилата ја загрозиле поморската безбедност, дејствувајќи без потребни дозволи и манипулирајќи со навигациските системи.