Според најновиот извештај на Меѓународната федерација на новинари (IFJ), 2025 година била една од најкрвавите за медиумските работници во светот, при што животот го загубиле најмалку 128 новинари и медиумски професионалци, меѓу кои и 10 жени.
Од федерацијата оценуваат дека станува збор за „уште една смртоносна година за новинарството“, посочувајќи дека државните институции во многу земји континуирано не успеваат да обезбедат заштита за медиумските работници. IFJ апелира на итна и решителна акција за прекин на спиралата на насилство и укажува дека неказнивоста за убиствата на новинари и понатаму е доминантна појава.
Во вкупниот број загинати се евидентирани и девет смртни случаи како последица на несреќи.
За споредба, во 2024 година IFJ регистрираше 122 убиени новинари, од кои 14 жени, додека бројот на затворени новинари тогаш изнесуваше 516. Во 2025 година, таа бројка дополнително пораснала на 533 новинари зад решетки, при што Кина е на врвот на листата.
Ажурираниот извештај за 2025 година вклучува 17 дополнителни смртни случаи регистрирани по 10 декември. Меѓу нив се случаи во Палестина, Танзанија, Перу и Гватемала, како и трагичен инцидент во Нигерија, каде што загинаа седум медиумски работници. Дополнително, пријавени се по еден смртен случај во Бурунди и Иран.
Најпогоден регион повторно е Блискиот Исток и арапскиот свет, каде што се убиени 74 новинари, од кои 56 во Палестина, што претставува 58 проценти од сите жртви на глобално ниво. Ова е трета година по ред овој регион да биде најсмртоносен за медиумските професионалци.
По бројот на загинати новинари, следуваат Јемен со 13, Украина со осум, Судан со шест, додека Индија и Перу пријавиле по четири смртни случаи. Неколку други земји, меѓу кои Филипините, Мексико, Перу и Пакистан, изгубиле по тројца новинари.
