На денешен ден, 11 Октомври, се одбележуваат 85 години од почетокот на Народното востание на македонскиот народ – историски настан што го означи почетокот на Народноослободителната антифашистичка војна во Вардарска Македонија во 1941 година.
Овој датум претставува еден од најзначајните моменти во македонската историја и симбол на борбата за слобода, државност и национална самобитност. Востанието ги продолжи слободарските традиции на македонскиот народ, втемелени во Карпошовото, Разловечкото, Кресненското и Илинденското востание, како и во стремежот за национално и социјално ослободување.
На 11 октомври 1941 година, борците од Првиот прилепски партизански одред извршија акции врз бугарската полициска станица, затворот и телекомуникациската инфраструктура во Прилеп, со што беше означен почетокот на организираниот вооружен отпор против фашистичката окупација.
Веќе следниот ден, на 12 октомври, вооружените активности се проширија и во Кумановско. Во месноста Менкова Колиба беше формиран Карадачкиот партизански одред, а во месноста Студена Вода Кумановскиот партизански одред, кои во наредните денови ги засилија борбените дејствија во регионот.
Денес, 11 Октомври останува симбол на храброста, отпорот и стремежот кон слобода, како еден од најзначајните датуми во современата македонска историја.
