Германското јавно обвинителство отвори истрага против 105-годишен маж под сомнение дека бил соучесник во повеќе убиства извршени во нацистички логор за воени заробеници за време на Втората светска војна.
Според Обвинителството во Дортмунд, мажот е осомничен дека служел како чувар во логорот „Сталаг 326 VI K“ во Сене, на северозападот на Германија. Паралелно се водела истрага и против уште еден поранешен чувар од истиот логор, но тој починал пред неколку месеци на 99-годишна возраст.
Од германските власти не се објавени дополнителни детали за случаите, кои повторно ги отвораат прашањата за гонењето на злосторствата од нацистичката ера, особено поради фактот што најголемиот дел од потенцијалните осомничени веќе не се живи.
„Сталаг 326 VI K“ бил еден од најголемите логори за советски воени заробеници во нацистичка Германија. Според историските податоци, низ логорот во периодот од 1941 до 1945 година поминале десетици илјади заробеници, од кои голем број починале поради глад, болести, тешки услови и принудна работа.
Од околу 180.000 до 200.000 советски воени заробеници регистрирани во логорот, голем број не го преживеале престојот, а десетици илјади биле погребани во близина на комплексот.
Во Сене биле затворени и припадници на армиите на Франција, Полска, Србија и Белгија. Според податоците на Меморијалниот центар „Сталаг 326“, во логорот загинале десетици илјади луѓе.
Германија од 1979 година нема рок на застарување за кривичните дела убиство и соучесништво во убиство, што овозможува и денес да се отвораат постапки за злосторства поврзани со нацистичкиот период.
Во меѓувреме, според медиумските извештаи, под истрага е и уште еден стогодишен поранешен чувар на логор, овојпат од „Хемер Шталаг VI A“.
Пред четири години, 101-годишниот Јозеф Шиц беше осуден на пет години затвор за соучесништво во убиство во концентрациониот логор „Заксенхаузен“. Тој беше најстариот нацистички злосторник изведен пред суд, но никогаш не ја отслужи казната бидејќи почина во 2023 година додека сè уште траеше постапката по неговата жалба.
