Поради врнежи од снег, сè уште е во сила забраната за сообраќај на тешки товарни возила и автобуси на патниот правец крак Шипковица – Попова Шапка, воведена утрово во 9:20 часот, соопшти Авто-мото сојузот на Македонија.
Сообраќајот на останатите државни патишта се одвива во зимски услови, по претежно влажни коловози. На повисоките места во западните и југозападните делови од државата, на одредени делници има помали остатоци од кашест снег на коловозот. Врнежи од снег со променлив интензитет се евидентираат во Крушево, Попова Шапка и Маврово, како и на планинските превои Стража и Ѓавато и на патниот правец Берово – Струмица.
Интензитетот на сообраќај надвор од градските средини е умерен, а на граничните премини од македонска страна нема подолги задржувања за влез и излез од државата.
АМСМ потсетува дека од 15 ноември 2025 година е во сила законската обврска за задолжително поседување зимска опрема во возилата, без оглед на временските услови, и таа ќе трае до 15 март 2026 година. Патниот правец Охрид – Ресен преку Националниот парк Галичица е затворен за сообраќај за сите видови возила во периодот од 21 ноември 2025 до 31 март 2026 година.
Од АМСМ апелираат на прилагодена брзина, почитување на сообраќајната сигнализација и внимателно управување со возилата, особено на патиштата низ котлините, речните долини и клисурите, каде постои зголемен ризик од одрони. Посебна внимателност се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
