Најмалку 44 лица се повредени, од кои една жена потешко, откако регионален патнички воз со околу 180 патници излета од шините меѓу градовите Руан и Кан, во северозападниот дел на Франција.
Според француските медиуми, возот се судрил со засега неидентификуван предмет на пругата, по што дошло до излетување од шините. Во несреќата еден вагон се превртел, а уште четири излетале од колосекот.
Францускиот министер за транспорт Филип Табаро првично соопшти дека има околу 20 повредени, но подоцна локалните власти потврдија дека бројот на повредени се искачил на најмалку 44 лица.
Несреќата се случила околу 19:30 часот по локално време, по што на местото веднаш биле испратени голем број спасувачки, медицински и полициски екипи.
Надлежните институции започнаа истрага за утврдување на причините за несреќата, како и за идентификација на предметот со кој се судрил возот.
