Многу марихуана се заплени од истражните органи. Вчера се одзема уште еден тон од компанија која требало „тревката” да ја сади само за медицински цели. Како тргна работата во Македонија имало повеќе нелегална марихуана од обична трева. За да се намали оваа појава вчера Владата на 6 од контролираните 14 компании им ги одзеде лиценците. Според наведеното таму имало неправилности во евиденцијата, отстапувања од одобреното производство и сомнежи за нелегално складирање и дистрибуција.
Претходно, истражните органи и при неодамнешната заплена на 40 тони марихуана наведоа дека дел од овие компании произведувале медицински канабис кој немал квалитет да се користи во медицински цели.
Па оттука е логично прашањето кое сега треба да го разрешат институциите на прогонот – дали кај дел од компаниите производството на медицинскиот канабис бил параван за профитабилен бизнис – продажба на марихуана на црниот пазар. Ако само во една акција можат да се запленат десетици тони од компании што со години работеле со лиценци, логично е прашањето: колку тони од оваа „медицинска” марихуана досега завршувала на црниот пазар? И дали е можно ова да функционирало вака, без поддршка од високи функционери од претходната власт, која делеше лиценци на ангро?
Власта почна да го одмотува ова клопче, ќе го направи ли тоа до крај?
