Четириесет и осумгодишен жител на Долно Седларце е лишен од слобода под сомнение дека неовластено споделувал и објавувал приватни фотографии и видеозаписи со експлицитна содржина од жена од Тетово, соопшти Министерството за внатрешни работи.
Според МВР, полициски службеници од Отсекот за компјутерски криминал при СВР Тетово на 7 септември го привеле З.Ѓ. (48), откако истиот ден жена од Тетово пријавила дека тој и уште едно лице неовластено споделиле и објавиле нејзини приватни фотографии и видеоснимки со експлицитна содржина, направени во периодот кога биле во љубовна врска.
Според пријавата, во текот на изминатите две години осомничениот во повеќе наврати барал пари од жената за да не ги објави снимките.
Со судска наредба бил извршен претрес во неговиот дом, при што полицијата одзела мобилен телефон и лаптоп компјутер.
Осомничениот е задржан во полициска станица, а по целосното документирање на случајот ќе биде поднесена соодветна кривична пријава поради сомнение за сторено кривично дело по член 152-а во врска со член 24 од Кривичниот законик.
