Собранието вечерва беше осветлено во портокалова боја по повод светската кампања „16 дена активизам против родово базирано насилство“, која се одбележува на глобално ниво и претставува повик за акција и солидарност со жртвите.
Претседателот на Собранието, Африм Гаши, преку објава на Фејсбук истакна дека овој потег не е само визуелен симбол, туку „јасна и моќна порака“ дека највисоката претставничка институција цврсто стои на страната на секоја жена и девојка.
„Нека портокаловата светлина послужи како повик за размислување, а заедно со оваа светлина да се разбуди и надежта за општество каде секоја жена и секоја девојка живее без страв, почитувана и заштитена“, напиша Гаши.
Генералната секретарка на Парламентот, Марина Димовска, додаде дека одлуката Собранието да биде осветлено во портокалово не е само симболика, туку силна порака за нетолеранција кон било каков облик на насилство врз жени и девојки.
„Заеднички да градиме општество во кое секоја жена живее без страв, почитувана и заштитена“, потенцира Димовска.
