Скопјани повторно без јавен превоз откако дел од приватните автобуси беа повлечени од сообраќај. Се претпоставува дека причината за тоа се нередовни исплати кон нив од ЈСП Скопје и истечените договори кои беа склучени во 2023 година.
Вчера ги немаше автобусите со број 23 и 45, а граѓаните беа останати зачудени на постојките незнаејќи што се случува со превозот. Претходно немаше никакви најави за прекин во превозот на некои линии или за проретчување на автобусите.
Никој од Градот не кажува што точно се случува. Според приватни превозници, проблемот се појавил откако договорите склучени пред две години им истекле, а нови немаат потпишано.
Додека не се реши проблемот со приватните превозници, граѓаните повторно се ставени во состојба долго да чекаат автобус кој воопшто нема да дојде.
Пред две години, градоначалничката Данела Арсовска ги прекина договорите со „Слобода превоз“ и „Мак експрес“, обвинувајќи ги за непочитување на договорни обврски. По неколку месеци на преговори и неуспешни јавни огласи, беше склучен нов договор со три приватни превозници и автобусите повторно се вратија на улиците.
Според законската регулатива, приватен превозник нема право да врши јавен превоз доколку нема валиден договор со локалната самоуправа или со ЈСП.
Доколку, и покрај тоа, автобусите на приватните компании продолжат со работа, тие се
изложуваат на санкции од страна на сообраќајната инспекција и полицијата.