Во рамки на истрагата за местење натпревари и нелегално обложување во турскиот фудбал, обвинителството во Истанбул соопшти дека се приведени уште 24 лица, меѓу кои и поранешниот потпретседател на Галатасарај, Ерден Тимур.
Меѓу уапсените се и потпретседателот на прволигашот Ејупспор, Фатих Кулаксиз, како и еден функционер на Турска фудбалска федерација.
Од обвинителството информираат дека биле издадени вкупно 29 налози за апсење, од кои 14 се однесуваат на фудбалери осомничени дека се обложувале на пораз на сопствените екипи. Шестмина од нив се под истрага поради сомнеж дека се обложувале и директно влијаеле на исходот од натпреварот меѓу Касимпаша и Самсунспор, одигран во октомври 2024 година.
Ова е трет бран апсења во рамки на обемната истрага за корупција во турскиот фудбал. Претходно, Турската фудбалска федерација во ноември суспендираше околу 150 фудбалски судии, како и речиси илјада фудбалери, од кои 25 настапувале во Првата лига.
