Речиси 3,9 тони кокаин со проценета улична вредност од 225 милиони евра запленија француските цариници во пристаништето Данкерк на северот на земјата.
Дрогата била скриена во контејнер со пластичен отпад кој пристигнал од Гана, соопшти француското обвинителство за организиран криминал.
Дел од пратката требало да продолжи кон белгиското пристаниште Антверпен. Запленетиот кокаин веќе е уништен, а француското обвинителство отвори истрага за случајот.
Француската правосудна полиција и пред заплената ја следела криминалната мрежа за која постои сомнение дека стои зад пратката.
Истрагата опфаќа сомневања за организиран увоз на наркотици и учество во криминално здружување. За овие кривични дела на осомничените може да им се изрече затворска казна до 10 години.
Француската царина во текот на 2025 година запленила вкупно 108,81 тони различни видови дрога, со проценета вредност од речиси 2,2 милијарди евра.
