Шпанската полиција, во соработка со повеќе меѓународни партнери, ја разби криминалната финансиска мрежа позната како „Банката на Дубаи“, која, според истрагата, обезбедувала финансиска поддршка за големи шверцерски организации што тргувале со кокаин.
Операцијата „Драхаб“, чии резултати беа објавени денеска, претставува завршница на повеќегодишна истрага што започнала во 2021 година, откако товарен брод со речиси 3,5 тони кокаин потонал во близина на шпанскиот град Хихон.
При првата полициска интервенција на бродот „Нехир“ биле откриени 1.835 килограми кокаин, а девет членови на екипажот биле уапсени. Додека бродот бил влечен кон пристаништето во Хихон, потонал, откако, според истрагата, капетанот намерно предизвикал навлегување вода за да сокрие уште околу 1.650 килограми дрога.
Подоцнежната истрага покажала дека членови на криминалната организација подоцна успеале да ја извлечат скриената пратка од потонатиот брод. Следејќи ги финансиските текови, истражителите стигнале до таканаречената „Банка на Дубаи“ – нелегална финансиска структура што функционирала надвор од официјалниот банкарски систем.
Според шпанските власти, оваа мрежа овозможувала брз трансфер на големи суми пари меѓу различни држави, со што се финансирале набавката и транспортот на кокаин од Јужна Америка. Добивката од трговијата потоа се перала преку недвижности, банкарски сметки и сложени финансиски трансакции.
Во завршната фаза од акцијата, извршена на 22 јули, во Шпанија биле уапсени 14 лица. Дополнителни седуммина осомничени биле приведени во Обединетите Арапски Емирати, Египет, Холандија и Шведска. Истовремено, остануваат активни уште 12 меѓународни налози за апсење.
Меѓу приведените е и главниот посредник на „Банката на Дубаи“, кого Европол го идентификувал како цел од висок приоритет. Од шпанското Министерство за внатрешни работи истакнуваат дека ова е првпат во Шпанија да биде уапсен член на оваа тајна финансиска мрежа.
Во рамките на истрагата биле блокирани 121 банкарска сметка со околу 2,3 милиони евра, како и 48 недвижности со проценета вредност поголема од 14 милиони евра. Запленети се и луксузни автомобили вредни над 1,6 милиони евра, готовина, часовници, накит, мобилни телефони и други вредни предмети.
Во акцијата учествувале Европол, Интерпол и полициски служби од повеќе држави. Шпанските власти најавија дека истрагата продолжува и не ја исклучуваат можноста за нови апсења во Шпанија и во странство.
