Две лица добија кривична пријава поради сомнение дека се вмешани во убиството што пред три дена се случи во скопската населба Дуќанџик, соопшти Министерството за внатрешни работи.
По спроведените мерки и активности, Единицата за насилен криминал – Одделението за крвни и сексуални деликти при СВР Скопје до Основното јавно обвинителство Скопје поднесе кривична пријава против Р.К. и И.С. поради постоење основи на сомнение дека сториле кривично дело „убиство“.
Според информациите од МВР, инцидентот се случил на 6 септември околу 23:30 часот, во близина на раскрсницата меѓу улиците „Прохор Пчински“ и „Војдан Чернодрински“ во Скопје.
Осомничените, движејќи се со мотоцикл, со огнено оружје пукале кон група лица кои се наоѓале на локацијата.
Во пукањето бил погоден 26-годишниот А.М. од Скопје. Тој со возило на Итната медицинска помош бил пренесен во Комплексот клиники „Мајка Тереза“, каде подоцна им подлегнал на повредите.
Надлежните институции продолжуваат со постапката за целосно расчистување на случајот.
