Поранешниот градоначалник на Струмица, Костадин Костадинов, ги отфрла како целосно неосновани наводите за сомнение за сторено кривично дело во врска со јавната набавка на електричните автобуси. Тој на својот профил на Фејсбук порача дека постапката за набавката е спроведена транспарентно и во согласност со законот.
Костадинов истакна дека проектот за електричните автобуси бил од стратешко значење за општината и дека денес граѓаните имаат јасни економски, еколошки и сообраќајни придобивки. Како што нагласи, иницијативата потекнала од Општината, била изгласана во Советот и реализирана преку формирање Јавно сообраќајно претпријатие, спроведена јавна набавка и целосна имплементација.
„Верувам дека сите овие чекори се спроведени согласно важечките закони. Лично јас, а се надевам и сите лица за кои постои сомневање дека сториле кривично дело, стоиме на располагање на надлежните институции за да биде појаснето како е реализиран проектот, кој денес беспрекорно функционира“, напиша Костадинов. На крајот додаде дека не сака да дава политички коментар.
Паралелно со неговата реакција, Министерството за внатрешни работи денеска информираше дека поднело кривична пријава против поранешниот градоначалник и уште пет лица поради сомнение за злоупотреби во постапката за јавна набавка на електричните автобуси.
„СВР Струмица до Основното јавно обвинителство поднесе кривична пријава против К.К. (35) од Струмица поради сомнение за ‘злоупотреба на постапката за јавен повик, доделување договор за јавна набавка или јавно-приватно партнерство’. Пријава е поднесена и против Д.П.С. (61) од Струмица, К.Б. (37) од Богданци, Л.Ј. (63) од Ново Село и Л.Ѓ. (62) од Струмица за ‘несовесно работење во службата’, како и против Г.П. (58) од Скопје поради сомневање за помагање при извршување на делата“, наведе МВР во соопштението.
