Градоначалникот на Скопје и претседател на ЗЕЛС, Орце Ѓорѓиевски, оствари работна средба со министерот за култура и туризам, Седат Сулејмани, посветена на подготовките за проектот „Скопје 2028 – Европска престолнина на културата“.
На средбата се разговарало за продлабочување на соработката меѓу Град Скопје и Министерството за култура и туризам, како и за активностите што треба да се реализираат во пресрет на 2028 година.
Меѓу темите биле мапирањето на културните капацитети, развојот на туристичките потенцијали и подобрувањето на координацијата меѓу локалните и националните културни институции.
Ѓорѓиевски истакна дека титулата „Европска престолнина на културата“ треба да донесе трајни придобивки за градот, преку обновени културни објекти, поголема поддршка за уметниците и подобра достапност на културните содржини за граѓаните.
Во рамките на посетата, Ѓорѓиевски и Сулејмани извршија увид и во тековните градежни активности за реконструкција на Универзалната сала.
Градоначалникот нагласи дека по завршувањето на реконструкцијата, Универзалната сала треба да биде предадена на управување на Град Скопје и повторно да стане центар на културниот живот во главниот град.
Според него, Универзалната сала претставува еден од најпрепознатливите симболи на Скопје, место каде што со децении се создавале значајни културни настани и спомени за повеќе генерации.
Ѓорѓиевски оцени дека со заедничка работа, јасна визија и координиран пристап се создаваат сите предуслови Скопје успешно да ја реализира програмата како Европска престолнина на културата во 2028 година и да остави трајни придобивки за градот и неговите жители.
