Четири лица биле лишени од слобода во текот на ноќта на подрачјето на Тетово и околните населени места, откако кај нив биле пронајдени марихуана и различни прашкасти материи, соопшти Министерството за внатрешни работи.
Првиот случај бил регистриран на 11 септември во 20:45 часот во село Боговиње. Полициски службеници сопреле автомобил „голф“ управуван од 24-годишниот А.Д. од село Челопек. При извршениот преглед кај него била пронајдена и одземена марихуана, по што бил лишен од слобода.
Околу 22:00 часот, во Тетово бил приведен и 44-годишниот Л.П. од Тетово, кај кого полицијата пронашла најлонска кесичка со кафеава прашкаста материја.
Во 23:20 часот, пред угостителски објект во село Боговиње, полициски службеници го лишиле од слобода и 32-годишниот Н.С. од село Здуње. Тој управувал автомобил „БМВ“ со швајцарски регистарски ознаки, а при прегледот кај него била пронајдена кесичка со бела прашкаста материја.
Последниот случај бил евидентиран на 12 септември во 00:40 часот во Тетово, кога бил лишен од слобода 21-годишниот Т.Ј. од село Бозовце. Кај него била пронајдена и одземена марихуана.
Четворицата се задржани во полициска станица, а од МВР информираат дека по целосното документирање на случаите против нив ќе бидат поднесени соодветни пријави.
