Министерката за енергетика, рударство и минерални суровини Сања Божиновска одржа работна средба со главниот државен ревизор Максим Ацевски, на која се разговараше за клучните наоди, утврдените слабости и препораките од ревизиите спроведени во институциите и субјектите од енергетскиот сектор.
На средбата беше истакната потребата ревизорските извештаи да не остануваат само формални документи, туку да претставуваат основа за подобрување на работењето и зајакнување на институционалната одговорност.
„Ревизорскиот извештај не смее да биде последниот чекор, тој мора да биде почеток на конкретни промени. Секоја забелешка и препорака мора да добие институционален одговор, јасен рок и одговорност за постапување“, изјави Божиновска.
Таа најави дека од надлежните институции ќе се бара подготовка на акциски планови со конкретни мерки, рокови за реализација и јасно утврдени одговорни лица.
Воедно, ќе биде воспоставен механизам за следење на спроведувањето на препораките, како и за утврдување на причините во случаите кога тие нема да бидат реализирани.
Според министерката, препораките на Државниот завод за ревизија не треба да останат само констатации на хартија, туку да доведат до конкретни институционални активности и подобрување на системот.
Божиновска оцени дека ваквиот пристап ќе придонесе за поодговорно управување со јавните средства, поголема ефикасност во работењето на институциите и повисоко ниво на отчетност во интерес на граѓаните.
