На сцената на Националната опера и балет вечер ќе биде изведен романтичниот балет „Жизел“ од Адолф Адам – едно од највлијателните дела во историјата на класичниот балет.
Диригент на изведбата е Едуард Амбарцумјан од Ерменија, додека кореографијата е поставена по оригиналите на Жан Корали, Жил Перо, Мариус Петипа и Леонид Лавровски, во адаптација на Ирена Пасариќ од Хрватска.
Во насловната улога – Жизел ќе настапи примабалерината Марија Кичевска Шокаровска, додека во улогата на Алберт ќе се појави Балаж Лочеи. Мирта ќе ја толкува Илијана Данилов, а Хиларион – Бобан Ковачевски.
Во изведбата учествуваат солистите, балетскиот ансамбл и оркестарот на Националната опера и балет.
Костимографијата и сценографијата се дело на Александар Ношпал, во соработка со Михајло Стојановски, концерт-мајстор е Климент Тодороски, а дизајнот на светло го потпишува Милчо Александров.
Балет за љубовта, измамата и прошката
„Жизел“ ја раскажува трагичната приказна за младата селанка која се заљубува во благородник што го крие својот вистински идентитет. По откривањето на измамата, дејствието преминува во мистичниот свет на вилите – каде љубовта и прошката добиваат поинаква димензија.
Лиричната музика на Адам и препознатливата кореографија го прават овој балет постојано присутен на светските сцени.
Врв на романтичниот балет
Премиерно изведен во Париз во 1841 година, „Жизел“ се смета за врв на романтичниот балет. Особено прочуениот втор чин – таканаречениот „бел чин“ – останува еден од најпрепознатливите симболи на класичната балетска естетика.
Со својата драматуршка длабочина и визуелна поетика, „Жизел“ и денес претставува предизвик и инспирација за балетските ансамбли ширум светот.
