Инспекциските служби на Агенцијата за храна и ветеринарство (АХВ) во последните денови спроведоа неколку засилени контроли со кои спречија влез на небезбедна храна на домашниот пазар. Најзначајната интервенција се однесува на пратка од 20.500 килограми замрзнат компир – помфрит од Холандија, за кој било утврдено дека има поминат рок на употреба (23.05.2025). Производот бил наменет за продажба во Македонија, но поради утврдената небезбедност увозот веднаш бил забранет.
Целата количина беше уништена во петокот на депонијата „Дрисла“, под надзор на инспектори на АХВ, согласно решението за забрана за увоз и наредбата за нештетно уништување.
Покрај ова, при вонреден надзор кај оператор што работи со храна од животинско потекло, инспекторите запленија и уништија 2.000 килограми небезбеден пилешки стек. Причината беше непочитување на правилата за Добра хигиенска и Добра производствена пракса. Операторот доби времена забрана за работа, како и парична санкција од 4.400 евра во денарска противвредност.
АХВ истакнува дека редовните и вонредните проверки на официјалните ветеринари и инспекторите за храна продолжуваат, со цел да се спречат ризици за здравјето на граѓаните и да се гарантира безбедноста во целиот синџир на производство и дистрибуција на храна.
