Побрза реакција на институциите, подобра заштита на жртвите и поефикасно гонење на сторителите се целите на новиот протокол за постапување во случаи на семејно насилство, договорен меѓу Јавното обвинителство, Министерството за внатрешни работи и Министерството за социјална политика, демографија и млади.
На работен состанок во Јавното обвинителство, јавниот обвинител Ненад Савески, министерот за внатрешни работи Панче Тошковски и министерот за социјална политика, демографија и млади Ѓоко Велковски усогласиле конкретни мерки за координирано и итно постапување по секоја пријава за семејно насилство.
Според договорениот протокол, МВР веднаш по приемот на пријава ќе го известува надлежното јавно обвинителство, по што јавниот обвинител ќе ја координира работата на тим составен од полициски инспектори и стручни лица од центрите за социјална работа.
Во рамки на новите мерки е предвидено без одлагање да се обезбедат вештачења за евентуалните повреди, да се изврши процена на ризикот и да се приберат сите потребни докази, со цел побрзо донесување обвинителски одлуки и покренување постапки против сторителите.
Дополнително, трите институции ќе назначат контакт-лица кои ќе бидат постојано достапни за меѓусебна комуникација и координација, а постапувањето ќе се одвива според стандардизирани процедури со јасно утврдени надлежности.
Од институциите очекуваат дека новиот модел на соработка ќе овозможи побрзо постапување по пријавите, поефикасна заштита и згрижување на жртвите, како и поуспешно процесуирање на сторителите пред надлежните судови.
