Осмиот ден од протестите против владата на Еди Рама во Албанија заврши со нови тензии во центарот на Тирана, каде дел од демонстрантите се судрија со полицијата, а припадниците на безбедносните сили употребија водени топови и солзавец за да го растераат собирот.
Според информациите од албанските медиуми, откако протестот пред централните институции бил прекинат, дел од младите демонстранти продолжиле да се движат низ улиците во центарот на главниот град.
„Еуроњуз Албанија“ објави дека демонстрантите се поделиле во повеќе групи и запалиле контејнери на неколку локации, додека „Балканвеб“ информира дека полицијата ги следела движењата на групите во областа околу Новиот пазар, центарот на градот и таканаречените Деветкатници.
Полициските сили поставиле контроли на повеќе места и вршеле проверки на лица за кои постои сомневање дека учествувале во протестите.
Во меѓувреме, албанскиот претседател Бајрам Бегај продолжи со дипломатски консултации, одржувајќи средби со претставници на западните дипломатски мисии, како и со поранешни претседатели на државата.
Поддршка за студентското движење најавија и дел од професорите, кои порачаа дека ќе продолжат да стојат зад барањата на студентите.
Засега нема официјални информации за конечниот број на повредени или приведени лица во вечерашните инциденти.
