Општина Илинден продолжува со реализација на инфраструктурните проекти насочени кон подобрување на локалната патна мрежа и создавање подобри услови за живот за жителите.
Завршено е асфалтирањето на шест улици во населените места Илинден, Мршевци, Марино и Кадино, во вкупна должина од околу 1.100 метри.
Во населбата Илинден се асфалтирани улицата „11“ и крак од улицата „8“, во Мршевци улицата „4“, во Марино два крака од улицата „531“, додека во Кадино е завршено асфалтирањето на крак од улицата „7“.
Градоначалникот на Општина Илинден, Александар Георгиевски, изврши увид во завршените градежни активности и посочи дека локалната самоуправа продолжува со засилено темпо на инвестиции во патната инфраструктура.
„Целта е создавање модерна патна мрежа, рамномерен развој на сите населени места и подобрување на условите за секојдневно живеење на граѓаните“, истакна Георгиевски.
Од Општина Илинден нагласуваат дека со реализацијата на овие проекти се подобрува безбедноста во сообраќајот, се олеснува движењето на жителите и се создаваат поквалитетни услови за сите граѓани.
